بسم الله الرحمن الرحيم
كلنا بنشوف على المشتتات الجديدة أنابيب لونها ذهبي غامق أو فضي لامع, وكلنا كمان عارفين انها حاجة كويسة ومفيدة في التوصيل الحراري وبتضمن كفاءة عالية في التبريد, لكن بتشتغل ازاي؟ أعتقد في ناس كتير عارفين لكن احب أوضحها برضو واكسب فيكم ثواب....
انا هبدأ اوضح بطريقة مختصرة وبسيطة جدآ وهتكلم الأول على المشتتات العادية (الي مافيهاش أنابيب توصيل), والمشتت وظيفته سهلة مجرد انو بيزود المساحة الي على اتصال مع الهواء الخارجي عشان توزيع الحرارة يبقى عالي (كل مازادت المساحة زاد التوصيل بين الحديد والهواء ), وكل ما كبر المشتت كل مازادت كفاءته دا قانون المفروض يتطبق فيزيائيآ, تمام يبقى كدا عرفنا المشتت العادي بيشتغل ازاي, طيب ماهو كويس اهو امال ليه بنحط أنابيب ونوجع دماغنا؟ . لأن في مرحلة معينة لما بيكبر المشتت الحرارة مابتنتقلش بالسرعة المناسبة ومابتوصلش لفوق, فبتبقى الحرارة محصورة في منطقة صغيرة مهما كبر حجم المشتت.
 | |
| الصورة دي بتوضح كلامي, لاحظ ان الحرارة محصورة في الجزء الي تحت, يعني لو كبرت طول المشتت 100 مرة مش هتفرق |
طيب امال إيه الحل؟؟ هنا يجي دور الأنابيب بقى, الأنابيب دي مش فريون زي مابعض النصابين في المحلات بيقولوا, الأنابيب دي مجوفة من جوا وفيها كمية صغيرة من سائل (عادة ماء أو كحول وأرجون) السائل ده بيبقى في الأنبوبة من تحت ولما المعالج بيسخن السائل ده بيمتص الحرارة ويتبخر, لما بيتبخر بيطلع على طول على فوق (قوانين فيزياء بقى) لما بيطلع فوق بيلاقي جزء من الأنبوبة أبرد من تحت (بسبب المروحة) فالغاز بيحصللو تكثف, والحرارة الي هوا امتصها بتطلع للمشتت من فوق ويعمل هوا شغله الباقي بقى, ويتحول الغاز لسائل تاني وينزل تحت وهكذا....
يبقى الفائدة الفعلية من الأنابيب دي انها عاملة زي جسر توصيل, زي طريق جانبي الحرارة تقدر تخلص بيه من زحمة الطريق العادي (المشتت), وتوصل لفوق بسرعة.
ومعظم شركات التبريد حاليآ بتصمم الأنابيب دي بتصميم يخليها تشتغل أحسن في الموضعين الأفقي والرأسي (عشان توزيع السائل مايتلخبطش) ويطلع فوق بدل ماينزل تحت أو العكس.
عشان كدا لازم تتأكد من الشركة الي اشتريت منها المبرد لأن في مقلدين بيحطو الأنابيب دي فاضية من جوا (ابقى قابلني لو اشتغلت) اشتري دايمآ من الشركات المعروفة......
وأتمنى اني أكون أفدتكم.
شكرآ. مدونة كومبيو عرب. http://compu-arab.blogspot.com/
ليست هناك تعليقات:
إرسال تعليق